Би саяхан болтол alexa-г тоож үздэггүй байлаа. (Хэрэв та анх удаагаа дуулж байгаа бол www.alexa.com гээд ороод үзээрэй.) Угаасаа вэбийн хандалтыг ямар ч ойлгомжгүй заадаг. Жагсаалт нь утгагүй санагддаг байв. Гэтэл Монголд байгаа хүмүүс, албан байгууллагууд зөвхөн alexa дээрх үзүүлэлтээс бусад сайтуудад дүгнэлт хийн шийдвэр гаргадаг нь илэрхий болж ирсэн юм.

За тэгээд судлаад байсан чинь тун чиг инээдтэй байдалд хүрэв.

1.  Alexa дээрх мэдээлэл нь зөвхөн Alexa түүлбар суулгасан хүмүүсийн л интернэт дээр ямар ямар вэб рүү орсоныг тооцож гаргадаг үзүүлэлт юм байна. Жишээ нь та одоо компьютер дээрээ ямар ч Alexa түүлбар суулгаагүй бол таны интернэт дээр хаагуур тэнэж явах нь Alexa дээр гарахгүй нь гэсэн үг байна. Тэр утгаараа Alexa дээрх мэдээлэл хэт өрөөсгөл юм. Тэгэхээр дан ганц Alexa дээрх мэдээлэлд дүгнэлт хийх аргагүй.
2.  Та өөрийн вэбийн рейтингээ өндөр болгохын тулд Alexa түүлбар компьютер дээрээ суулгачихаад вэб руугаа дахин дахин өдөр бүр ороод байхад тодорхой хэмжээний үр дүнтэй байдаг гэнэ. Энэ ч утгаар нь вэб админууд Alexa түүлбарыг маш их ашигладаг төдийгүй, тэдний вэб ч Alexa дээр өндөр рейтингтэй байх магадлал сайтай гэнэ.

За тэгээд би өөрийнхөө олж мэдсэн зүйлээс үндэслэн туршилт хийхээр шийдсэн юм. Юуны түрүүнд компьютер дээрээ Alexa түүлбар суулгалаа. Ойр дотныхоо хүмүүст ч Alexa түүлбар суулгахыг зөвлөсөн юм. Мэдээж тэгээд зогссонгүй.

Хамгийн Alexa түүлбартай байж болох бүлэг хүмүүс болох бусад вэбийн админуудад хандсан үйлчилгээ хийж эхэллээ. Вэбийн админууд бол Цахим.нэтийн хэрэглэгчдийн тодорхой нэг бүлэг хэрэглэгчид бол мөнөөс мөн. Тэд өөрсдийн вэбээ Цахим.нэт-д хамгийн түрүүнд байршуулахыг хүсэхээс гадна бусад өрсөлдөгч вэбүүдийг эндээс орж танддаг нь нууц биш юм. Харин тэднийг тогтмол оруулж байх ямар нэгэн шалтаг олох хэрэгтэй байлаа. Тэгээд бид вэб админуудад зориулсан web tools гэсэн категори гаргалаа. Түүндээ вэбээ хөгжүүлэхэд зориулсан бүхий л байж болох түүлүүд суулгаж өглөө. SEO tools, analytics tools, web tools, webmaster's tools, business tools гэх мэт. Би хийсэн ажилдаа үнэхээр сэтгэл хангалуун байсан төдийгүй өөрөө ч өдөр бүр хэрэглэж чадахаар сайн resource болж чадсан юм. Тэгээд админууддаа имэйлээр мессенжерээр түүлбараа сурталчилж өгсөн юм.

Төдхөн би Цахим.нэтийн Alexa дээрх рейтинг мэдэгдэхүйцээр ахиж байгааг харсан юм. Эхлээд Монголоос хандалтаараа эхний #53-т байснаа аажмаар өгссөөр #29 хүртэл дээшилсэн юм. Гэхдээ хамгийн инээдтэй нь энэ хугацаанд манай сайтад орж байгаа зочдын тоо өсөөгүй харин буурч байсан юм. Мэдээж Монголд зуны улирал, хүн болгон хөдөө гадаа, зуслан дээрээ амарч байдаг цаг тул манай хэрэглэгчдийн хандалт тогтмол 16000 байснаас 10000 болтлоо буурсан үзүүлэлттэй байсан юм.
Тэгэхлээр эндээс ямар дүгнэлтэнд хүрч болох вэ гэвэл Alexa дээрх жагсаалт бол зүгээр л Alexa түүлбартай хүмүүсийн вэбийн хандалтыг үзүүлсэнээс нийт хүн амын вэбийн хандалтыг үзүүлж чаддаггүй. Тэрнээс гадна вэбийн админууд өөрсдийн сайтдаа өдөрт хэдэн зуун удаа тогтмол орж байдаг нь тоологддог тул яаж ч байсан өрөөсгөл тоо гардаг. Тиймээс та Alexa дээрх жагсаалт тодорхой хэмжээнд үнэнд дөхөх тоо гарахыг хүсвэл өнөөдөр өөрийнхөө компьютерт Alexa түүлбар суулгахыг зөвлөж байна.